Litterae Helveticae
Notker Balbulus: The Hymnbook

Notker Balbulus

Liber Ymnorum
Tempus Nativitatis

De Sancto Johanne Apostolo

LINGUA

Latina

Johannes, Jesu Christo

multum dilecte virgo:

Tu eius amore carnalem

In navi parentem liquisti.

Tu leve coniugis pectus

respuisti Messiam secutus,

Ut eius pectoris sacra

meruisses fluenta potare.

Tuque in terra

positus gloriam

conspexisti filii dei,

Quae solum sanctis

in vita creditur

contuenda esse perenni.

Te Christus in cruce triumphans

matri suae dedit custodem,

Ut virgo virginem servares

atque curam suppeditares.

Tute carcere

flagrisque fractus

testimonio

pro Christi es gavisus.

Idem mortuos

suscitas inque

Jesu nomine

venenum forte vincis.

Tibi summus

tacitum ceteris

verbum suum pater revelat.

Tu nos omnes

precibus sedulis

apud deum semper commenda,

Johannes, Christi care.

the_abbey_of_st_gall