Agone triumphali
militum regis summi
Dies iste celebris
est populis
ipsi regi credulis.
Hi delectamentum
respuerant mundanorum
Et crucem tunc turpem
cottidie baiolarunt.
Hos nullius feritas
a Christo separat,
Quin ad eum mortibus
millenis properent.
Non carcer ullus aut catena
molliunt fortia
in Christo pectora:
Sed nec ferarum morsus diri
martyrum solidum
excavant animum.
Non imminens capiti
gladius territat
Fortissimos milites
optimi domini.
Nunc manu dei
complexi persequentum
insultant furoribus
quondam crudelibus
Et plebi Christi
solamen suppeditant
in cunctis laboribus
lubrici saeculi.
Vos Christi martyres
Nos valde fragiles
precibus nos iusto iudici
sinceris iugiter
commendare curate.
