Notker Balbulus

Liber Ymnorum
Sanctorale

In Assumptione Sanctae Mariae
d. XV m. Aug.

[N.32] "Congaudent angelorum chori"

LINGUA

Latina

Congaudent angelorum chori

gloriosae virgini,

Quae sine virili

commixtione genuit

Filium, qui suo

mundum cruore medicat.

Nam ipsa laetatur, quod caeli

iam conspicatur principem,

In terris cui quondam sugendas

virgo mamillas praebuit.

Quam celebris angelis Maria,

Jesu mater, creditur,

Qui filii illius debitos

se cognoscunt famulos!

Qua gloria in caelis

ista virgo colitur,

Quae domino caeli

praebuit hospitium

sui sanctissimi corporis!

Quam splendida polo

stella maris rutilat,

Quae omnium lumen

astrorum et hominum

atque spirituum genuit!

Te, caeli regina,

haec plebecula

piis concelebrat mentibus:

Te cantu melodo

super aethera

una cum angelis elevat.

Te libri,

virgo, concinunt prophetarum,

chorus iubilat sacerdotum,

apostoli

Christique martyres praedicant.

Te plebes

sexus sequitur utriusque,

vitam diligens virginalem,

caelicolas

in castimonia aemulans.

Ecclesia ergo cuncta,

te cordibus

teque carminibus venerans,

Tibi suam manifestat

devotionem,

Precatu te supplici

implorans, Maria,

Ut sibi auxilio

circa Christum dominum

esse digneris per aevum.

the_abbey_of_st_gall

Notker Balbulus
Liber Ymnorum

Monasterium Sancti Galli
881 - 887