Stirpe, Maria, regia
Procreata,
regem generans Jesum,
Laude digna
angelorum sanctorum,
Et nos peccatores
tibi devotos
intuere benigna!
Tu pios patrum mores
ostentas in te,
sed excellis eosdem.
Patris tui Salomonis
in te lucet sophia,
Et Ezechiae
apud deum cor rectum,
sed numquam in te corrumpendum.
Patris Josiae adimplevit
te religiositas.
Summi etiam
patriarchae te fides
totam possedit, patris tui.
Sed quid nos istos
recensemus heroas,
Cum tuus natus
omnes praecellat illos
atque cunctos per orbem?
Nos hac die
tibi gregatos serva,
virgo, in lucem mundi
qua prodisti
paritura caelorum lumen.
