Dilecte deo,
Galle, perenni
Hominibusque et coetibus
angelorum,
Qui Jesu Christi oboediens
arduae svasioni
Praedia patris,
gremium matris,
Coniugis curam,
ludicra nati
Sprevisti pauperem
pauper dominum sequens
Et crucem gaudiis
praetulisti lubricis.
Sed Christus
pretio centuplicato
Haec compensat,
ut dies ista testatur,
Dum tibi nos omnes
filios dulci
subdit affectu
Sveviamque svavem
patriam tibi,
Galle, donavit,
Nec non et iudicem in caelis
apostolorum choro iunctum
te fecit sedere.
Te nunc suppliciter precamur,
ut nobis Jesus Christum, Galle,
postules favere
Et locum corporis
eius pace repleas
Ac tuos supplices
crebra prece subleves,
Ut tibi debitam
honorificentiam
Laetabundi semper
mereamur solvere,
O GALLE, DEO DILECTE!
