Laus tibi, Christe,
Cui sapit, quod videtur
ceteris esse surdastrum:
Famulatu cuius omnis
competit sexus et aetas.
Recentes atque teneri milites,
Herodiano ense
trucidati, te
hodie praedicaverunt:
Licet necdum potuerint ligula,
effusione tamen
te, Christe, sui
sanguinis praeconati sunt,
Lac cum cruore fundentes
ad deum clamitaturum,
Uda pupilli quem gena
miseret et innocentis.
Quis athletarum
fortissimus umquam
Exercitibus
tantam, Christe, suis
contulit victoriam,
Quantam vagiens
coaevulis tuis
Tu praestitisti,
mittens eos caelum
regnaturos perpetim?
O Christi praecones clari
floresque martyrum corusci
… Et confessorum
insignes gemmulae sanctorum
Atque sterilium
in mundo virginum,
Cari filioli,
dulces pusioli:
nos iuvate precibus!
Quas Christus, innocentem
mortem vestram miserans
Pro se maturatam,
placidus exaudiens
nos regno suo dignetur.
